आर के पुरम उत्तराखण्ड सांस्कृतिक मंड़ल कैरि द्वी दिना कौथिग कु आयोजन

रंत रैबार व्यूरो

नई दिल्ली। आर. के. पुरम सेक्टर 12 म आरकेपुरम उत्तराखण्ड सांस्कृतिक एवं भ्रातृ मंडल द्वारा द्वी दिवसीय कौथिग /शरदोत्सव कु आयोजन करेगे। ये आयोजन म जख सांस्कृतिक आयोजन बि प्रस्तुत ह्वेन वखी गढवाळी कवि सम्मेलन बि पैलि दौं ह्वे। ये आयोजन म खाद्य स्टाल व उत्तराखण्ड का अनाज व कै बनि का स्टाल लग्यां छाया। बिगत कै वर्षों बिटिन यख यु कौथिग आयोजित हूणू च। संस्था का अध्यक्ष सुनील पोखरियाल ल बोलि कि हमरी कोशिश च कि हम अपरा प्रवासी लोगों तैं खासकर नै पीढ़ी तैं अपरा सरोकार, संस्कृति व रीति-रिवाजों से परिचित करै सकौ। यना आयोजन ये बाराम भौत सहयोगी होंदन। आयोजन समिति म मुख्य भाष्करानंद कुकरेती,सुनील पोखरियाल, मुकेश सुन्दरियाल, दिनेश नेगी, लक्ष्मी नेगी, मोहन सिंह बिष्ट, हरेन्दर असवाल, बिनोद गुसाईं, शान्ति बिष्ट आदि सब्बि आयोजक लगातार ये आयोजन तैं सफल कना खातिर जतन कना रैन। उत्तराखण्ड लोक-भाषा साहित्य मंच दिल्ली द्वारा विगत साल बिटिन आर के पुरम सैक्टर नौ म गढ़वाली कुमाऊनी भाषा शिक्षण केन्द्र म बि समिति कु लगातार सहयोग मिलणों च।

कवि सम्मेलन कु संचालन करदा उत्तराखण्ड लोक-भाषा साहित्य मंच दिल्ली का संयोजक दिनेश ध्यानी ल बोलि कि हमरि कोशिश छ कि हम कवि सम्मेलन का माध्यम से अपणा लोगों तैं अपणि भाषा कि समाळ कना संदेश देण चाणाछौ। श्री ध्यानी ल बोलि किं जब जनगणना होलि ता मातृ भाषा का कौलम म आपन गढ़वाली भाषा लिखण। जां से हमरि भाषा कि गणति बढलि व हम सरकार का समणि अपणि बात मजबूती से राखि सकदन।? वॉल बोलि कि हौरि समाज जख बि गै वो अफु दगड़ि अपणि भाषा तैं अफु दगड़ि लिगीं पर हमुल अपणि भाषा साहित्य व संस्कृति तैं सिर्फ गीत व संगीत समझि। अर ये म हमुल अपणि भाषा साहित्य तैं छौड़ि दे। ज्व कि भौत सोचनीय बात च ? अब हमरा लोग दीन दुन्या म सौब जगा छन ता हमर्तें अपणि भाषा साहित्य कि संत समाळ बि करण चैंद। कवि सम्मेलन म बरिष्ठ कवि चन्दन प्रेमी, पयाश पोखड़ा, दर्शन सिंह रावत, दिनेश ध्यानी व डॉ सुशील सेमवाल द्वारा कवितापाठ करेगे। कवि सम्मेलन की श्रोताओं ला भौत प्रशंसा कैरी। लोगों ल बोलि कि यना आयोजन जब होंदन ता कवि सम्मेलन बि होण चंदन। बरिष्ठ समाजसेवी एम् पी ककत्वान जी ला बोलि कि आर.के. पुरम उत्तराखण्ड सांस्कृतिक एवं भ्रातृ मंडल जना संगठन समाज का हर वर्ग व सरोकारों का खातिर लगातार समाज तैं एकजुट कना छन। बरिष्ठ समाजसेवी व आरकेपुरम उत्तराखण्ड सांस्कृतिक एवं भ्रातृ मंडल का पूर्व अध्यक्ष डी. डी. कुकरेती ल बोलि कि भौत हर्ष की बात च कि हमरी संस्था लगातार समाज म काम करणी च। आज य संस्था एक बड़ा आयाम परेँ काम करणी। ये आयोजन म प्रवेश गौनियाल, आजाद रावत, मनोज बिष्ट आदि उपस्थित छाया। लोक गायक मुकेश कठैत व वोंकि टीम द्वारा सांस्कृतिक कार्यक्रम प्रस्तुत करेगैन। सुहेल दौं स्थानीय बाल कलाकारों व महिलाओं का ग्रुप द्वारा सांस्कृतिक कार्यक्रम प्रस्तुत करेगैन। कुल मिलैकि यु कौथिग भौत बढ़िया छौ। लोगों ने भौत प्रशंसा कैरि।

वरिष्ठ समाजसेवी डीपीएमआई का चेयरमैन व उत्तराखण्ड लोक-भाषा साहित्य मंच दिल्ली का संरक्षण डाक्टर बिनोद बछेती जी व बोलि कि हमरि भाषा-हमरि पछ्‌याण च। हमरि कोशिश छ कि हम अपणि नै पीढ़ी तैं अपणि भाषा सिखै सकौ। यांका खातिर उत्तराखण्ड लोक-भाषा साहित्य मंच दिल्ली का संयोजक दिनेश ध्यानी जी का संयोजकत्व म लगातार भाषा शिक्षण कक्षाओं कु संचालन हूणों छ। ध्यानी जी इंग्लैंड म बि भाषा सिखाणा ओनलाइन कक्षा चलौणा छन।

आयोजन म स्थानीय विधायक अनिल शर्मा, सांसद बांसुरी स्वराज, नई दिल्ली लोकसभा निर्वाचन क्षेत्र का भाजपा प्रभारी डाक्टर बिनोद बछेती ब पार्षद धर्मवीर आदि उपस्थित छाया।

ये द्वी दिना कौथिग म हजारों लोगों ल शिरकत कैरि। अनाज व आर्टीफिशियल ज्वेलरी व कै बनिका स्टाल लग्यां छाया। कुल मिलैकि यु आयोजन भौत बढ़िया समळौण देगे।